Proel/A nosa bandeira


A NOSA BANDEIRA


AZUL

           Os pinos, foguetes verdes;
        das suas ponlas pendurado,
        chora o ceo estremecido,
        do gris inverno amayado.
       
       
BRANCO
       
           Os ledos regueiros,
        mozos e algareiros,
        van á romaría
        tocando os pandeiros.
        Pandeiros de prata,
        de breixas, de neve,
        vasos cristaiños,
        onde o día bebe.
       
       
ESCUDO
       
           O cáliz do sol reverte
        roxo sangue do serán.
        Sete estrelas, como pombas
        que tornan ao seu pombal,
        crucifican o silenzo
        arredor do Sant-Graal.